娄一晨：真作孽，重庆力帆不玩了

　　难得在台里吃午饭。周一正是在食堂里，遇到了足球组的几个编辑。

　　编辑：娄老师，听说了伐？重庆力帆准备退出中超联赛了？

　　我：啊，真啊？就是尹老板迭只重庆力帆？好像交关年数呒没听到伊拉呃消息了。啥情况？不鸣则以，一鸣惊人吗？

　　编辑：就是呀，迭支球队落到中甲好几年了，今年总算又冲出来了。据说讲尹老板今年掼了7000万进去！

　　我：呵呵，7000万？结棍！明年混中超的话至少要投入翻一倍伐，大概还勿够！

　　编辑：当然勿够！娄老师现在中超联赛转播少了，消息勿灵通了。侬晓得今年河南建业花了多少钞票？2亿啊……结果呢，还就是正好保级！

　　我笑了：哦哟，格记我洋盘了，2亿投入只好保级？怪勿得尹老板是要退出了，格只无底洞吓人哦！格么，重庆当地政府呒没伸手拉伊一把吗？

　　编辑：呵呵，就是因为当地政府表示呒没办法满足尹老板呃要求，所以人家尹老板绝望了，写拨重庆市政府哦报告里厢讲——要么球队卖脱，要么卖勿脱就彻底退出，勿白相了……

　　我：格么现在有人肯接盘伐啦？

　　编辑：好像到现在为止还呒没。据说尹老板已经寻过几只下家，但是人家侪觉着买得起养勿起，勿敢接手。

　　我：唉，想想当初尹老板五斤吼六斤冲进来哦辰光，作孽是真作孽！

　　编辑：娄老师，格么像尹老板迭种情况真哦呒没办法救了？

　　我：呵呵，尹老板白相足球十几年了伐？有啊里一年伊从足球里厢赚着过钞票？对伐？老头子欢喜足球OK哦，愿意为中国足球做一点贡献还OK哦，但是每年只看见用钞票呒没看见赚钞票，侬讲侬好撑几年？我老早讲过，连得许家印老板也觉着吃力了，要噱人家马云进来帮忙，格么尹老板撑勿下去勿是老正常啊？

　　编辑：迭呃倒是真啊！只好怪中国足球呃土壤环境太差，呒没办法自家养活自家，连得一点点养活自家呃希望还看勿到……唉……

　　我：就是呀！拨我讲起来，迭呃就是一只怪圈：最早嘛是国家包养一切。隔手国家觉着养勿起了，改成职业化，掼拨市场，掼拨老板。但是啥人晓得迭只职业化连半成品还弗是，市场嘛更加勿晓得了嗨啥地方，只好靠老板。奈么连老板啊撑勿动了……

　　大家默然！